پیر، 8 اگست، 2022

پانچ لاکھ کا نچوڑ صرف پانچ

 امام ابو حنیفہ رحمت اللہ علیہ کو پانچ لاکھ احادیث یاد تھی ، ایک دن انہوں نے اپنے بیٹے حماد کو نصیحت کرتے ہوئے فرمایا کہ بیٹے میں آپکو پانچ لاکھ احادیث کا نچوڑ صرف پانچ احادیث میں بیان کررہا ہوں ۔۔ 


1۔ نبی کریم ﷺ نے فرمایا اعمال کا دارومدار نیتوں پر ہے اور انسان کے لیے وہی ہے جس کی اس نے نیت کی ہو۔


2۔ نبی کریم ﷺ نے فرمایا انسان کے اسلام کی خوبی یہ ہے کہ لا یعنی فضول چیزوں کو ترک کر دے۔


3۔ نبی کریم ﷺ نے فرمایا تم مومن نہیں ہو سکتے جب تک اپنے مسلمان بھائی کے لیے وہ چیز پسند نہ کرو جو اپنے لیے کرتے ہو۔


4. نبی کریم ﷺ نے فرمایا حلال بھی ظاہر ہے اور حرام بھی اور دونوں کے درمیان شبہ کی چیز ہے جن کو بہت سے لوگ نہیں جانتے۔ سو جو شخص شبہات سے بچا اس نے دین محفوظ کر لیا اور جو شخص شبہات میں پڑ گیا وہ حرام میں پڑ جائے گا جیسا کہ چرواہا اپنا ریوڑ کسی کھیت کی باڑ کے پاس لے جائےگا تو عنقریب ایسا ہو گا کہ اس کا ریوڑ کھیت میں بھی چرنے لگے گا۔ بلاشبہ ہر بادشاہ نے باڑلگا دی ہے اور اللہ کی باڑ حرام کردہ اشیا ہیں


5۔ نبی کریم ﷺ نے فرمایا کامل مسلمان وہ ہے جس کے ہاتھ اور زبان سے کسی مسلمان کو تکلیف نہ پہنچے


یہ پانچ احادیث سنانے کے بعد فرماتے ہیں بیٹا ان پانچ احادیث کو آئینے کی طرح رکھنا اور اپنے اعمال کا ان پانچ احادیث پر محاسبہ کرتے رہنا۔ یہ پانچ احادیث ان پانچ لاکھ احادیث کا نچوڑ ہیں جو مجھے یاد ہیں ۔


از مجموعہ امام وصایا امام اعظم رحمۃ اللہ ص: ۶۴

سلیمان الراجحی انتقال کر گئے

 *سلیمان الراجحی انتقال کرگئے انکا شمار دنیا کے 20 سخی / فیاض ترین افراد میں شمار ہوتا ہے ۔ سعودی عرب کے شہر "القصیم" میں واقع کھجوروں کے ایک باغ میں کم و بیش کھجور کے 2 لاکھ درخت ھیں اور یہ باغ راہِ اللہ میں وقف ھے .. اِس باغ میں 45 قِسم کی کھجوریں ھوتی ھیں ، یہاں کی سالانہ پیداوار 10 ھزار ٹن کھجور ھے.. یہ باغ روئے زمین میں پایا جانے والا سب سے بڑا وقف ھے .. اِس باغ کی آمدنی سے دُنیا کے مختلف ممالک میں مساجد کی تعمیر ، خیراتی کام اور حرمین شریفین میں افطاری کے دسترخوان لگائے جاتے ھیں.. یہ باغ سعودی عرب کے امیر ترین شخص "سلیمان الراجحي" نے اللہ کی راہ میں وقف کِیا ھے.. سلیمان الراجحي نے غُربت میں آنکھ کھولی ، وہ اسکول میں پڑھ رھے تھے کہ ایک دن اسکول اِنتظامیہ نے تفریحی ٹُوور تشکیل دِیا اور ھر طالب علم سے ایک ایک ریال جمع کروانے کو کہا ، یہ گھر میں جاتے ھیں مگر والدین کے پاس ایک ریال تک نہیں ھوتا ، یہ بہت روتا ھے ، ٹُوور کے لِئے جانے کی تاریخ قریب آتی ھے ، اِدھر اِن کے سہ ماھی اِمتحانات کا رزلٹ آتا ھے ، یہ* *کلاس میں پوزیشن لیتے ھیں اور ایک فلسطینی اُستاد بطورِ اِنعام اِنہیں 1 ریال دیتا ھے.. یہ دوڑتے ھوئے تفریحی پروگرام کے مسئول کے پاس جاتے ھیں اور 1 ریال جمع کراتے ھیں.. وقت کو جیسے پر لگ جاتے ھیں ، یہ اپنی تعلیم مکمل کر کے جدہ شہر میں ایک کمرے کو بنک کا نام دے کر کام شروع کرتے ھیں ، مختصر عرصے میں الراجحي کے نام سے بنکوں کا ایک جال پورے سعودی عرب میں پھیل جاتا ھے.*.

*سلیمان الراجحي اپنے اِس فلسطینی اُستاد کی تلاش میں نِکلتے ھیں ،اُستاد سے ملاقات ھوتی ھے ، وہ ریٹائرڈ ھو چُکے ھیں ، معاشی حالات ایسے کہ گھر کا چولہا جلانا مُشکل ھوا پڑا ھے ، راجحی اپنے فلسطینی اُستاد کو گاڑی میں بِٹھاتے ھیں اور اُن سے کہتے ھیں کہ میرے اُوپر آپ کا قرض ھے .. اُستاد آگے سے کہتا ھے کہ مجھ مسکین کا کِس پر قرض ھو سکتا ھے ، راجحی اپنے اُستاد کو یاد کراتے ھیں کہ سالوں پہلے آپ نے مجھے 1 ریال اِنعام دِیا تھا ، اُستاد مُسکراتا ھے کہ آپ اب وہ ایک ریال مجھے واپس کرنا چاھتے ھیں؟..*

*راجحی ایک بنگلے کے سامنے گاڑی کھڑی کرتا ھے جِس کے سامنے ایک بیش قیمت گاڑی بھی کھڑی ھے ، راجحی اپنے اُستاد سے کہتا ھے یہ بنگلہ اور گاڑی اب سے آپ کے ھیں ، مزید آپ کے تمام اخراجات ھمارے ذِمہ ھوں گے.. فلسطینی اُستاد کی آنکھوں میں آنسو آتے ھیں اور کہتا ھے کہ یہ عالی شان بنگلہ یہ مہنگی گاڑی یہ تو بہت زیادہ ھے.. راجحی کہتا ھے اِس وقت آپ کی جو خوشی ھے اِس سے بڑھ کر میری خوشی کا عالم تھا جب آپ نے مجھے 1 ریال اِنعام دِیا تھا.. ایسے محسن شناس اِنسان کو اللہ ضائع نہیں کرتا.. سلیمان الراجحی نے 2010 میں اپنے بچوں ، بیگمات اور عزیز و اقارب کو بُلا کر اپنی دولت اُن سب میں تقسیم کر دی اور اپنے حِصے میں جو کچھ آیا وہ سب وقف کر دِیا..اِس وقت سلیمان الراجحي کے وقف کی مالیت 60 ارب ریال سے زیادہ ھے .. یہ سعودی الوطنیہ کمپنی اور الراجحی بینک کے مالک ہیں، جنہوں نے کورونا وائرس کیلئے 170/ ملین ریال امداد کے طور پر دیا ہے ، اور مکہ مکرمہ کے اندر دو ہوٹل وزارت صحت کے حوالے کردیا ہے ۔ گنیز بک میں اب تک سب سے بڑے وقف کے طور پر یہ باغ ریکارڈ کے طور پر درج ہے۔۔*

*فوربس میگزین نے انہیں دنیا کے بیس عظیم فیاض لوگوں میں شمار کیا ہے۔ ان کی سوانح حیات پڑھنے کے لائق ہے۔ شاید سعودی عرب کا کوئی شہر ایسا نہیں ملے گا، جہاں الراجحی فیملی کی طرف سے مسجدیں نہ تعمیر کی گئی ہو، نیز دعوتی سینٹرز، مقراۃ قرانيۃ خیراتی جمعیت وغیرہ میں آپ کا بھر پور تعاون رہتا ہے۔ اور سب سے بڑی بات یہ ہے کہ یہ اپنے ملازمین کو ماہ ختم ہونے سے پہلے ان کی اجرت دے دیتے ہیں جن ملازمین کی تعداد ۱۵۰,۰۰۰ ڈیڑہ لاکھ سے ذیادہ ہے۔*


*اس عظیم ہستی کا انتقال ہوگیا ہے۔*

*انا للّٰہ وانا الیہ راجعون*

ابتدائے محبت کا قصہ

 ابتدائے محبت کا قصہ " 


یہ کہانی شاعر سلطان الرواد نے 2001 میں لکھی تھی۔ اس کہانی نے خلیج عرب کی جامعات کی سطح پر بہترین مختصر کہانی کا ایوارڈ جیتا تھا ۔


شاعر : سلطان الرواد 

عربی سے اردو میں براہ راست ترجمہ نگار : توقير بُھملہ 


عہدِ بعید میں، زمین و آسمان کی آفرینش کے بعد ،جب ابھی بشر کا عدم سے وجود میں آنا باقی تھا، اس وقت زمین پر اچھائی اور برائی کی قوتیں مل جل کر رہتیں تھیں. یہ تمام اچھائیاں اور برائیاں عالم عالم کی سیر کرتے گھومتے پھرتے یکسانیت سے بے حد اکتا چکیں تھیں.

ایک دن انہوں نے سوچا کہ اکتاہٹ اور بوریت کے پیچیدہ مسئلے کو حل کرنا چاہیے،

تمام تخلیقی قوتوں نے حل نکالتے ہوئے ایک کھیل تجویز کیا جس کا نام آنکھ مچولی رکھا گیا.

تمام قوتوں کو یہ حل بڑا پسند آیا اور ہر کوئی خوشی سے چیخنے لگا کہ "پہلے میں" "پہلے میں" "پہلے میں" اس کھیل کی شروعات کروں گا..

پاگل پن نے کہا "ایسا کرتے ہیں میں اپنی آنکھیں بند کرکے سو تک گنتی گِنوں گا، اس دوران تم سب فوراً روپوش جانا، پھر میں ایک ایک کر کے سب کو تلاش کروں گا" 

جیسے ہی سب نے اتفاق کیا، پاگل پن نے اپنی کہنیاں درخت پر ٹکائیں اور آنکھیں بند کرکے گننے لگا، ایک، دو، تین، اس کے ساتھ ہی تمام اچھائیاں اور برائیاں اِدھر اُدھر چھپنے لگیں، 

سب سے پہلے نرماہٹ نے چھلانگ لگائی اور چاند کے پیچھے خود کو چھپا لیا، 

دھوکا دہی قریبی کوڑے کے ڈھیر میں چھپ گئی، 

جوش و ولولے نے بادلوں میں پناہ لے لی، 

آرزو زیرِ زمین چلی گئی، 

جھوٹ نے بلند آواز میں میں کہا، "میرے لیے چھپنے کی کوئی جگہ باقی نہیں بچی اس لیے میں پہاڑ پر پتھروں کے نیچے چھپ رہا ہوں" ، اور یہ کہتے ہوئے وہ گہری جھیل کی تہہ میں جاکر چھپ گیا، 

پاگل پن اپنی ہی دُھن میں مگن گنتا رہا، اناسی، اسی، اکیاسی، 

تمام برائیاں اور اچھائیاں ایک ایک کرکے محفوظ جگہ پر چھپ گئیں، ماسوائے محبت کے، محبت ہمیشہ سے فیصلہ ساز قوت نہیں رہی ، لہذا اس سے فیصلہ نہیں ہو پا رہا تھا کہ کہاں غائب ہونا ہے، اپنی اپنی اوٹ سے سب محبت کو حیران و پریشان ہوتے ہوئے دیکھ رہے تھے اور یہ کسی کے لئے بھی حیرت کی بات نہیں تھی ۔

حتیٰ کہ اب تو ہم بھی جان گئے ہیں کہ محبت کے لیے چھپنا یا اسے چھپانا کتنا جان جوکھم کا کام ہے. اسی اثنا میں پاگل پن کا جوش و خروش عروج پر تھا، وہ زور زور سے گن رہا تھا، پچانوے، چھیانوے، ستانوے، اور جیسے ہی اس نے گنتی پوری کی اور کہا "پورے سو" محبت کو جب کچھ نہ سوجھا تو اس نے قریبی گلابوں کے جھنڈ میں چھلانگ لگائی اور خود کو پھولوں سے ڈھانپ لیا، 

محبت کے چھپتے ہی پاگل پن نے آنکھیں کھولیں اور چلاتے ہوئے کہا "میں سب کی طرف آرہا ہوں" "میں سب کی طرف آرہا ہوں" اور انہیں تلاش کرنا شروع کردیا، 

سب سے پہلے اس نے سستی کاہلی کو ڈھونڈ لیا، کیوں کہ سستی کاہلی نے چھپنے کی کوشش ہی نہیں کی تھی اور وہ اپنی جگہ پر ہی مل گئی، 

اس کے بعد اس نے چاند میں پوشیدہ نرماہٹ کو بھی ڈھونڈ لیا، 

صاف شفاف جھیل کی تہہ میں جیسے ہی جھوٹ کا دم گُھٹنے لگا تو وہ خود ہی افشاء ہوگیا، پاگل پن کو اس نے اشارہ کیا کہ آرزو بھی تہہ خاک ہے، 

اسطرح پاگل پن نے ایک کے بعد ایک کو ڈھونڈ لیا سوائے محبت کے، 

وہ محبت کی تلاش میں مارا مارا پھرتا رہا حتیٰ کہ ناامید اور مایوس ہونے کے قریب پہنچ گیا، 

پاگل پن کی والہانہ تلاش سے حسد کو آگ لگ گئی، اور وہ چھپتے چھپاتے پاگل پن کے نزدیک جانے لگا، جیسے ہی حسد پاگل پن کے قریب ہوا اس نے پاگل پن کے کان میں سرگوشی کی " وہ دیکھو وہاں، گلابوں کے جُھنڈ میں محبت پھولوں سے لپٹی چھپی ہوئی ہے"


پاگل پن نے غصے سے زمین پر پڑی ایک نوکدار لکڑی کی چھڑی اٹھائی اور گلابوں پر دیوانہ وار چھڑیاں برسانے لگا، وہ لکڑی کی نوک گلابوں کے سینے میں اتارتا رہا حتیٰ کہ اسے کسی کے زخمی دل کی آہ پکار سنائی دینے لگی ، اس نے چھڑی پھینک کر دیکھا تو گلابوں کے جھنڈ سے نمودار ہوتی محبت نے اپنی آنکھوں پر لہو سے تربتر انگلیاں رکھی ہوئی تھیں اور وہ تکلیف سے کراہ رہی تھی، پاگل پن نے شیفتگی سے بڑھ کر محبت کے چہرے سے انگلیاں ہٹائیں تو دیکھا کہ اسکی آنکھوں سے لہو پھوٹ رہا تھا، پاگل پن یہ دیکھ کر اپنے کیے پر پچھتانے لگا اور ندامت بھرے لہجے میں کہنے لگا، یا خدا! یہ مجھ سے کیا سرزد ہوگیا، اے محبت! میرے پاگل پن سے تمھاری بینائی جاتی رہی، میں بے حد شرمندہ ہوں مجھے بتاؤ میری کیا سزا ہے؟ میں اپنی غلطی کا ازالہ کس صورت میں کروں؟ 

محبت نے کراہتے ہوئے کہا " تم دوبارہ میرے چہرے پر نظر ڈالنے سے تو رہے، مگر ایک طریقہ بچا ہے تم میرے راہنما بن جاؤ اور مجھے رستہ دکھاتے رہو" 

اور یوں اس دن کے واقعے کے بعد یہ ہوا کہ، محبت اندھی ہوگئی، اور پاگل پن کا ہاتھ تھام کر چلنے لگی ، اب ہم جب محبت کا اظہار کرنا چاہیں تو اپنے محبوب کو یہ یقین دلانا پڑتا ہے کہ "میں تمھیں پاگل پن کی حد تک محبت کرتا ہوں

Copied

جمعرات، 14 جولائی، 2022

ترقی کی ماں

 ترقی کی ماں !

نعیم مسعود

10 جولائی ، 2022




زندہ ہوتی تو پنجابی میں کہتی ’’پتر ایویں ’جھل کداندا‘ پھرنا اے !‘‘ لیکن ہمیں بھی معلوم ہے، ممتا کے سامنے مروجہ اصولوں اور معروف فارمولوں کی کیا وقعت ہے، اس کا پنجابی میں کہنے کا اردو مطلب ہوتا کہ، ان آوارہ گردیوں میں کیا رکھا ہے گر تحقیق نہیں؟ مگر اس کا کہنا شیریں بیانیوں کا وہ مُرغ و مُتَنجَن ہوتا ہے کہ بس رہنے ہی دیجئے۔ یار ! یہ ہر ماں ترقی ہی کی ماں کیوں بن جاتی ہے؟


گود سے گور تک کا سبق بھی تو وہی دیتی ہے کہ علمی دامن سے چپکے رہنا ہے، بناکر فقیروں کاہم بھیس غالبؔ ... تماشائے اہل کرم دیکھتے ہیں، تو شکایتیں کیسی ؟ جب راقم یہ کہتا ہے کہ امریکہ کو عذابِ الٰہی کے علاوہ کوئی شکست نہیں دے سکتا، تو رقیبوں سے ہم نوا کہتے ہیں چائنہ کم نہیں، روس یہ، روس وہ، جرمنی کی ٹیکنالوجی کی یہ بات اور جاپان کی کمٹمنٹ کی وہ بات۔ میں سنتا رہتا ہوں ، اور وہ امریکی آتش و آہن کے طریقوں اور سلیقوں کو وجہ کامیابی گردان کر مزید سیخ پا ہو جاتے ہیں، تو میں عرض کرتا ہوں ، لوگو! بات امریکی جنگوں اور بموں کی کہانیوں کی نہیں ہے، بات اس کی پانچ ہزار سے زیادہ ان دانش گاہوں کی ہے جہاں محققین قابلِ عمل تحقیق کو رواج اور قوت بخشتے ہیں۔ جب تک امریکہ کی ریسرچ بکتی ہے تب تک امریکہ کو نیست و نابود کرنا دیوانے کے خواب کے علاوہ کچھ بھی نہیں۔ اور آپ کے ہاں بھی کوئی دیوانگی کے سپنوں سے ہٹ کر جو سائنس و ٹیکنالوجی کے خواب دیکھتے ہیں، امریکہ ان کو بھی بمعہ اہل و عیال ’’اغوا‘‘ کرنے کیلئے تیار رہتا ہے۔ پھر آپ ماتم کرتے پھرتے ہوکہ برین ڈرین ہوگیا۔ ایف آئی آر کٹواتے پھرتے ہو کہ، فل برائٹ اسکالر شپ بھی امریکی سازش ہے۔ جب آپ جہاد بالقلم بھول جاؤ ، تحقیق کی ان روایات کو بالائے طاق رکھ دو جو کبھی بغداد کے کوچہ و بازار میں نو من تیل بھی رکھتی تھی اور رادھا کا ناچ بھی ، تو امریکہ سے شکایتیں کیسی ؟


جب آپ کا اپنا قرآن بارہا جہاد کی بات کرتا ہےتو کم از کم آپ کی اپنی جامعات جو آپ کی دانش گاہیں اور محققین کی کمین گاہیں ہیں، وہ عہد حاضر میں یہ فرمان کیوں نہیں سمجھتے کہ، سائنس و ٹیکنالوجی و انجینئرنگ ہی جہاد ہے، اور جہاد بالقلم بھی!


ریاست کے اندر کی ’’سب-اسٹیٹس‘‘، اسٹیٹ کی کامرس، اکنامکس، بائیو ٹیکنالوجی ، انجینئرنگ ، فارماسیوٹکس اور معاشرتی علوم کو کتنا تیار یا خام مال ایکسپورٹ کرتی ہیں، اسی سے حساب لگ جاتا ہے کہ قوم کا تخیل، خواب، امید اور مفید کس ڈگر پر ہیں۔ کسی قوم کے دماغ خالی ہوں گے تو اس کی جامعات ایکسپورٹ کوالٹی کو رواج کیسے بخشیں گی، اگر جامعات ایکسپورٹ کوالٹی کے معیار اور اعتبار کو جنم اور رُخ نہیں دیں گی، تو کوئی اسٹیٹ سوشل انجینئرز اور سماجی سائنس دانوں کو اسٹیٹ مین کا درجہ کیسے دے گی؟ المعروف گلوبل ولیج ایک اکنامک وار پلیس ہے جہاں جنگ و جدل میں بھی مثبت نفسیات دودھ اور شہد کی نہریں بہاتی ہے، جہاں روشن خیالی بائیولوجیکل وار کے در و دیوار پر بھی ویکسین سازی کے پھول اور بیلیں چڑھاتی ہے، جہاں انسان دوست حرص و ہوس کی جنگ میں بھی جوہری توانائی سے زخم دینے کے بجائے کینسر کا علاج اور کوڑھ کی کاشت کا خاتمہ چاہتا ہے، اور یہ سب جنگل کے سوداگر ملکوں میں ملتا ہے مگر کوئی تو ہو جو ہماری وحشتوں کا ساتھی ہو اور امن کے پیامبروں اور بناؤ کے پیغمبروں کی امت میں سے اٹھ کر جہاد بالقلم کی بات کرے اور نوبل پرائز کے حصول پر نظر رکھے کہ ہم آزادی کشمیر کے پلیٹ فارم پر آن بان اور شان سے کہہ سکیں کہ، کشمیر پاکستان کی شہ رگ ہے، اور ہمارے کہنے کا وزن ہو۔


دو تین ارب ڈالر کیلئے آئی ایم ایف ہمیں تگنی کا ناچ نچا رہاہے، کبھی گارنٹی مانگی جاتی ہے اور کبھی فیٹف سے نکلنے کی تصدیق، اور یہ سب کیوں ہو رہا ہے ؟ اس کا جواب یہ ہے کہ یونیورسٹیاں ریاست کو معیاری جینا مرنا مہیا نہیں کر رہیں اور ریاست یونیورسٹیوں کو لیڈرشپ کے بجائے ’’فیڈرشپ‘‘ دینے کے درپے ہے۔ نہ ایچ ای سی کا چیرمین بغیر سفارش ملتا ہے نہ کوئی شیخ الجامعہ ہم میرٹ پر لانے کی کامیاب کوشش کرتے ہیں۔ پھر کوڑھ کی کاشت نہ ہو، تو کیا ہو؟ پھر جمہوریت کے پھولوں کے بجائے آمریت کے کانٹے نہ ہوں تو کیا ہو؟ لیڈر اسٹیٹس مین کی جگہ حرص و ہوس کا پجاری نہ ہو تو کیا ہو؟


ورنہ ماں ، جو یونیورسل ترقی کی ماں ہے، وہ جو دولت ہم قرض اور مدد کی مد میں مانگتے پھرتے ہیں،ماں نے تو گود ہی میں کان میں پھونک دیا تھا کہ علم بڑی دولت ہے!


امریکہ کی یونیورسٹیوں میں پلیجرزم کے کانٹوں کے بجائے تحقیق کی نکہتیں ، عرق آمیزے اور فارمولے بکتے ہیں، سو رب بھی عقل اور محنت کو زوال نہیں دیتا، اور رب قبول بھی نعروں کو نہیں ریاستوں کو کرتا ہے۔ ان باتوں کا اظہار جب پچھلے دنوں یونیورسٹی آف پونچھ، راولا کوٹ، آزاد جموں و کشمیر میں کرنا پڑگیا تو حاضرین میں سے جواں ہمت محققین کے چہروں سے وہ پرامید کرنیں پھوٹیں جو ایکوسسٹم کیلئے ضیائی تالیف کا باعث بنتی ہیں۔ ان آفتاب و ماہتاب کے اندر کی تڑپ کی گواہی پرعزم اور متحرک قوتوں کے مالک وائس چانسلر پروفیسر ڈاکٹر زکریا ذاکر بھی دیں گے، جو لاہور میں کو تو اسلاموفوبیا کے توڑ اور اوکاڑہ میں ہوں تو تعمیرسازی کے جوڑ میں فکر مند رہتے ہیں، توقع ہے پونچھ کی فضاؤں اور راولاکوٹ کوٹ کی ہواؤں کو لیڈرشپ کی شعاعوں سے منور اور معطر کریں گے ورنہ ہم نے ایسی لیڈر شپ بھی دیکھ رکھی ہے جو اربوں روپے عمارت سازی پر لگا دیتی ہے مگر پی ایچ ڈی کرانے والی کیمسٹری لیب میں سال بھر پانی نہیں ملتا۔ کاش وہ عمارت سازی کے کمیشن کے بجائے تعمیر سازی کی انٹرپرنیورشپ سے کمیشن کی توقع رکھتے!


تحقیق اور محقق کے مابین عشق جبکہ سیاستدان اور جمہوریت کے مابین الفت کا رشتہ کہتا ہے کہ، وہ ماں کبھی نہیں مرتی جو پلنے کیلئے گود اور کھِلنے کیلئے دھرتی مہیا کرتی ہے۔ وہ قدموں تلے جنت رکھنے والی ماں ہو یا ریاست کی شکل میں وسیع اور پاکدامنی والی۔ اگر بلاولوں اور مریموں نے یہ سبق سیکھ لیا تو ہم آبِ حَیات کے کنارے کنارے آباد بصورتِ دیگر ہم بھکاری اور بیماری۔ سبسڈی پر قوم کو کھڑا کرنا معیار نہیں ویلفیئر اسٹیٹ کے طور پر پاؤں جمانا معیار ہے، اسٹیٹ بینک کو آئی ایم ایف کے نہیں اسٹیٹ کی منشا پر چلانا معیار ہے۔ ماں ’جھل کدانے‘ کے طنز میں دراصل پاؤں جمانے کی بات کرتی تھی، ماں تو نام ہی ترقی کی نشاندہی کا ہے، تبھی تو ہم کبھی کشمیر تو کبھی پنجاب کی دانش گاہوں سے خیر مانگتے ہیں تو کبھی سندھ، کے پی اور بلوچستان کی درس گاہوں سے!

لمبے عرصہ تک جوان رہنا چاہتے ہیں تو توجہ دیجئے

 ٹاپ لابسٹر

جاوید چوهدری




لابسٹر (Lobster) سمندر میں ہوتے ہیں اور ہم انسان انھیں بڑی رغبت سے کھاتے ہیں، ہم اور لابسٹر دونوں مکمل طور پر مختلف مخلوق ہیں لیکن اس کے باوجود ہم دونوں میں ایک چیز کامن ہے اور وہ ہے سیروٹونین (Serotonin) اور آکٹوپامن (Octopamin) کیمیکل کا کمبی نیشن، ہم انسانوں اور لابسٹر کی ترقی اور تنزلی کا سسٹم ایک ہی ہے، ہم دونوں ایک ہی طرح زندگی میں آگے بڑھتے اور کام یاب ہوتے ہیں، یہ سسٹم کیا ہے؟


ہم اسے ایک چھوٹی سی مثال سے سمجھ سکتے ہیں، آپ مختلف قسم کے لابسٹرز کو پکڑیں اور کسی ڈرم میں پھینک دیں، لابسٹر فوری طور پر ڈرم کے مختلف کونوں میں گردش کریں گے اور پھر چند لمحوں میں ڈرم کو اچھے اور برے دو حصوں میں تقسیم کر دیں گے اور پھر اچھی جگہ کے حصول کے لیے ایک دوسرے سے لڑنا شروع کر دیں گے، ان کی لڑائیاں چاراسٹیجز میں ہوں گی، سب سے پہلے بڑے سائز کا لابسٹر اس اچھی جگہ پر قابض ہو جائے گا، ڈرم میں اگر اس وقت صرف ایک لابسٹربڑا اور باقی سائز میں چھوٹے ہوں گے تو چھوٹے بڑے کے حق کو تسلیم کر لیں گے اور یوں یہ معاملہ پہلی اسٹیج پر نبٹ جائے گا لیکن اگر ڈرم میں دو یا دو سے زائد برابر سائز کے لابسٹر ہوں گے تو پھر لڑائی کا دوسرا فیز شروع ہو جائے گا، یہ آمنے سامنے کھڑے ہو کر ایک دوسرے کو ڈرانا اور دھمکانا شروع کر دیں گے۔



 

اس فیز میں اگر کوئی ایک لابسٹر جیت گیا اور دوسرے یا دوسروں نے سائز میں برابر ہونے کے باوجود اپنی ہار مان لی تو معاملہ یہاں بھی نبٹ جائے گا اور اس ڈرم میں سب اطمینان اور شانتی کے ساتھ زندگی گزارنے لگیں گے لیکن اگر ڈرانے اور دھمکانے کے بعد بھی جنگ کا فیصلہ نہیں ہوتا تو پھر جھڑپیں شروع ہو جائیں گے، بڑے سائز کے لابسٹر ایک دوسرے کے خلاف چھاپہ مار کارروائیوں کا آغاز کر دیں گے، یہ جنگ اگر یہاں سیٹل ہو گئی تو ٹھیک ورنہ بہترین جگہ کے حصول کی لڑائی چوتھے اور آخری فیز میں داخل ہو جائے گی، فریقین کے درمیان خوف ناک لڑائی ہو گی اور یہ جنگ اس وقت تک جاری رہے گی جب تک کوئی ایک اپنی شکست نہیں مانتا یا کوئی ایک مر نہیں جاتا۔


اگر ایک فریق شکست مان لے تو ڈرم کی بہترین جگہ جیتنے والے کے قبضے میں چلی جائے گی اور یوں ڈرم میں امن ہو جائے گا اور جیتنے والا ڈرم کے تمام باسیوں کا سردار بن جائے گا اور ہارنے والے اس کی رعایا، یہ آخری جنگ سیٹل ہونے کے بعد ڈرم کی فضا میں ایک نئی تبدیلی آ جائے گی، کام یاب لابسٹر کا سائز مزید بڑا ہو نے لگے گا اور یہ پہلے سے زیادہ خوب صورت ہو جائے گا اور تمام فی میل لابسٹرز اس کام یاب لابسٹر کی طرف متوجہ ہو جائیں گی اور وہ مضبوط، خوب صورت اور سائز میں بڑے لابسٹر پیدا کریں گی، یہ کام یاب لابسٹرحیاتیات کی زبان میں ٹاپ لابسٹر کہلاتا ہے۔


ماہرین طویل مدت سے ریسرچ کر رہے تھے لابسٹر ایک دوسرے کے ساتھ لڑتے کیوں ہیں؟ جیتنے والے لابسٹر جیت کے بعد مزید بڑے اور خوب صورت کیوں ہو جاتے ہیں اور ہارنے والوں کا سائز کیوں چھوٹا رہ جاتا ہے اور یہ بدصورت اور بے ہمت کیوں ہو جاتے ہیں؟ طویل ریسرچ کے بعد پتا چلا یہ دو کیمیکلز سیروٹونین اور آکٹوپامن کا کھیل ہے، لابسٹر جوں جوں جیتتا جاتا ہے اس کے جسم میں سیروٹونین کیمیکل کی مقدار بڑھتی اور آکٹوپامن کی کم ہوتی جاتی ہے اور یہ جب حریفوں کو مکمل طور پر شکست دے دیتا ہے تو سیروٹونین انتہائی بلندی اور آکٹوپامن انتہائی پستی کو چھو رہا ہوتا ہے اور اس کے بعد اس کے سائز اور کشش دونوں میں اضافہ ہو جاتا ہے۔



 

یہ ٹاپ لابسٹر بن جاتا ہے جب کہ باقی لابسٹر اس سے کم تر، چھوٹے اور بدصورت ہونے لگتے ہیں اور یہ باقی زندگی اس سے لڑنے یا الجھنے کی غلطی نہیں کرتے، ہم انسانوں میں بھی ترقی اور تنزلی، بہادری اور بزدلی اور خوب صورتی اور بدصورتی کا یہی کمبی نیشن ہوتا ہے، ہم بھی انھی دونوں کیمیکلز کا کھیل ہیں، ہم جب زندگی میں کام یاب ہونے لگتے ہیں تو ہمارا سیروٹونین بھی بڑھنے لگتا ہے اور آکٹوپامن کی سطح نیچے آنے لگتی ہے، ہم جوں جوں آگے بڑھتے جاتے ہیں ہمارا سیروٹونین اوپر جاتا جاتا ہے اور آکٹوپامن نیچے سے نیچے ہوتا جاتا ہے جب کہ ناکامی کی صورت میں سیروٹونین کا لیول پست ہوتا جاتا ہے اور آکٹوپامن کی سطح بڑھتی جاتی ہے لہٰذا ناکام لوگ پست ہمتی، بے بسی، خودترسی اور مظلومیت کے گڑھے میں گرتے چلے جاتے ہیں۔


سیلف ہیلپ کی دنیا میں طویل عرصے سے یہ بحث چل رہی تھی امیر اور کام یاب آدمی کی دولت، صحت، عمر، انرجی، خوب صورتی اور چارم میں کیوں اضافہ ہو جاتا ہے اور غریب آدمی وقت گزرنے کے ساتھ ساتھ کیوں مزید غریب، بیمار، بد صورت اور چارم لیس ہوتا جاتا ہے، لابسٹر پر ریسرچ کے بعد پتا چلا اس کے ذمے دار سیروٹونین اور آکٹوپامن کیمیکلز ہیں، ان کی شرح غریب کو غریب تر اور امیر کو امیر تر بناتی چلی جاتی ہے، ہماری دولت اور کام یابی میں جوں ہی اضافہ ہوتا ہے ہماری شخصیت میں چارم بھی پیدا ہو جاتا ہے، ہم خوب صورت بھی ہو جاتے ہیں اورہماری عمر بھی لمبی ہو جاتی ہے جب کہ غریب آدمی میں یہ سائیکل الٹا ہوتا ہے، یہ جوں جوں ناکام ہوتا جاتا ہے اس کا آکٹوپامن لیول اوپر جاتا جاتا ہے اور یوں یہ غربت کے ساتھ ساتھ بیمار بھی ہوتا جاتا ہے، اس کا قد اور وزن بھی کم ہوتا جاتا ہے اور یہ چارم لیس بھی ہوتا چلا جاتا ہے۔



 

یہ تھیوری جوں ہی آئی یہ گتھی بھی سلجھ گئی کام یاب آدمی مزید کام یاب، امیر آدمی مزید امیر، اچھا اسپورٹس مین مزید اچھا اسپورٹس مین، مشہور لکھاری مزید مشہور لکھاری، کامیاب ایکٹر مزید کام یاب ایکٹر، کام یاب سیاست دان مزید کام یاب سیاست دان اور کام یاب سائنس دان مزید کام یاب سائنس دان کیسے بن جاتے ہیں؟ یہ بھی معلوم ہو گیا ایڈی سن نے صرف 84 سال کی زندگی میں 1093 ایجادات کیسے کر لی تھیں، دنیا کے تین ہزار بلینئر کورونا کے زمانے میں مزید امیر کیسے ہو گئے، شاہ رخ خان اورسلمان خان اسٹار سے سپر اسٹار کیسے بن گئے اور برین ٹریسی کی تخلیق اور ریسرچ میں وقت گزرنے کے ساتھ ساتھ اضافہ کیسے ہوتا گیا اور دنیا کے کام یاب لوگ ستر اسی سال کی عمر میں نئی شادی کیوں اور کیسے کر لیتے ہیں اور ان پر نوجوان لڑکیاں کیوں مرنے لگتی ہیں اور ان لوگوں کی اوسط عمر نوے سال کیوں ہوتی ہے؟


یہ سب سیروٹونین کا کمال ہے، یہ کام یاب لوگوں کے جسم کو وقت گزرنے کے ساتھ ساتھ مزید سے مزید ککس دیتا جاتا ہے اور یہ آگے سے آگے بڑھتے چلے جاتے ہیں، یہ نکھرتے چلے جاتے ہیں، پاکستان میں سید بابر علی، عمران خان، طلعت حسین، مستنصر حسین تارڑ، عطاء الحق قاسمی اور پروفیسر احمد رفیق اس کی مثال ہیں، یہ وقت گزرنے کے ساتھ ساتھ پہلے سے زیادہ جوان، متحرک، چارم فل، بزلہ سنج اور بہادرہوتے جا رہے ہیں، طلعت حسین صحافی ہیں، یہ پانچ سال سے مشکل دور سے بھی گزر رہے ہیں لیکن یہ وقت گزرنے کے ساتھ ساتھ پہلے سے زیادہ فٹ، خوب صورت اور بہادر ہوتے جا رہے ہیں، پروفیسر احمد رفیق نوے سال کو ٹچ کر رہے ہیں لیکن یہ آج بھی پندرہ پندرہ گھنٹے بولتے اور درجنوں لوگوں سے روزانہ ملتے ہیں اور ہم عمران خان اور میاں شہباز شریف کی سیاسی زندگی سے بھی لاکھ اختلاف کرسکتے ہیں لیکن یہ لوگ جسمانی لحاظ سے انتہائی فٹ بھی ہیں اور یہ ایک بار پھر اپنی "سیاسی سپیس" بھی پیدا کرتے چلے جا رہے ہیں، یہ کیوں اور کیسے ہو رہا ہے؟ بس دو کیمیکلز۔


ہم اب آتے ہیں، اس سوال کی طرف، کیا عام انسان اپنا سیروٹونین لیول بڑھا اورآکٹوپامن کم کر سکتا ہے؟ سو فیصد کر سکتا ہے، ہمیں پہلے یہ بات ذہن نشین کرنی ہو گی یہ دونوں کیمیکلز کام یابی سے متعلق ہیں، ہم جوں جوں کام یاب ہوتے جاتے ہیں ہمارا سیرٹونین لیول زیادہ اورآکٹوپامن کم ہوتا جاتا ہے جب کہ ہار اور شکست کی شکل میں یہ سائیکل الٹ ہو جاتا ہے لہٰذا ہمیں جان بوجھ کر، سوچ سمجھ کر اپنی کام یابیاں بڑھانا اور ناکامیاں کم کرنا ہوں گی مثلاً آپ چھوٹی چھوٹی کام یابیوں کی فہرست بنائیں، صبح جلدی اٹھنا، تیار ہو کر باہر نکلنا، کتابیں پڑھنا، واک اور ایکسرسائز، وقت کی پابندی، زیادہ سننا، کم بولنا، شکر بڑھانا اور شکوہ کم کرنا، ناراض گاہک کو راضی کرنا، دوسروں کی بدتمیزی برداشت کر لینا، صدقہ اور خیرات بڑھانا، دائیں جانب چلنا، دوسروں کو راستہ دینا، خواتین کا احترام کرنا اور لوگوں سے خوش دلی سے ملنا، یہ بظاہر چھوٹے چھوٹے کام ہیں لیکن یہ کام یابیاں ہیں۔


یہ آپ کا سیروٹونین لیول بڑھاتی ہیں اور یہ لیول بڑھتے بڑھتے آپ کو کام یاب لوگوں کی فہرست میں لے آتا ہے اور آپ جلد یا بدیر ٹاپ لابسٹر بن جاتے ہیں اور یوں آپ کے قد کاٹھ، خوب صورتی، عمر اور دولت میں اضافہ ہو جاتا ہے اور آپ اگر یہ عادات نہیں اپناتے تو پھر آپ کا آکٹوپامن لیول بڑھتاچلا جائے گا اور اس کے نتیجے میں آپ کا قد، قامت، رنگ، اعتماد، صحت اور تعلقات ہر چیز دائو پر لگ جائے گی لہٰذا میرا مشورہ ہے آپ روزانہ کم از کم دس بار چھوٹی چھوٹی کام یابیاں حاصل کرتے رہا کریں، ان شاء اللہ آپ کی زندگی بدل جائے گی۔