جمعرات، 16 اگست، 2018

بحوالہ سورۃ یوسف

حدیث مبارک

الســــلام علیـــکم ورحمت الله وبرکاتہ

بحوالہ سوره یوسف
آیت 4

حضرت جابر بن عبدالله (رض) راوی ھیں کہ کریم آقا صلی الله علیہ وآلہ وسلم کے پاس بستانہ نام کا ایک یہودی آیا اور اس نے کہا "اے محمد (صلی الله علیہ وآلہ وسلم) مجھے ان ستاروں کے نام بتائیے جن کو یوسف (علیہ السلام) نے اپنے سامنے سجدہ کرتے ھوئے دیکھا تھا 
آپ نے ابهی جواب نہیں دیا تها کہ اسی وقت جبرئیل امین حاضر ھوئے اور ان 11 ستاروں کے نام بتا دیے آپ نے یہودی کو بلایا اور پوچھا کہ "اگر میں ان کے نام بتا دوں تو کیا تم مان لو گے"؟
اس نے کہا "هاں"
پھر آپ نے یہ نام بتائے "جبران، الطارق، الذیال، ذو التکفین، قابس، وثاب، عمودان، الفلیق، المصبح، الضروح، ودوالفرغ، الضیا اور النور"
اس یہودی نے کہا " الله کی قسم ان ستاروں کے یہی نام ھیں"

جامع البیان
حدیث 14441

مسلم حکمران اور پروپیگنڈا

COPIED

ایک انتہائی قابل مطالعہ تحریر
مسلم حکمران اور پروپیگنڈا_ .

چند سال سے اس ملک کے ٹیلیویژن چینلز پر تعلیم کے نام پر سفید جھوٹ پر مبنی پروگرام چلائے جا رہے ہیں اور یہ باور کرانے کی کوشش ہے کہ جب یورپ میں یونیورسٹیاں کھل رہی تھیں تو مسلم بادشاہ تاج محل اور شالامار باغ بنا رہے تھے.میری یہ تحریر مختلف مصنفین کے متعلقہ کالمز اور پروفیسرز، مورخین یا محققین کی تحقیق کے اس حصہ پر مبنی ہے جو میں نے ذاتی تحقیق کے بعد درست پائے، اس تحریر میں میرے اپنے الفاظ کم اور مندرجہ بالا شخصیات کے الفاظ زیادہ ہیں. تاریخ کی گواہی بعد میں پیش کروں گا پہلے بنیادی عقل کا ایک درس پیش کروں. ان چینلز یا پروگرامز میں اگر کوئی سمجھ بوجھ والا آدمی بیٹھا ہوتا تو اسکو سمجھنے میں یہ مشکل نہیں آتی کہ مسلم دور کی شاندار عمارات جس عظیم تخلیقی صلاحیت سے تعمیر کی گئی، وہ دو چیزوں کے بغیر ممکن نا تھیں. پہلی فن تعمیر کی تفصیلی مہارت، جس میں جیومیٹری، فزکس، کیمسٹری اور ڈھانچے کے خدوخال وضع کرنے تک کے علوم شامل ہوتے ہیں. دوسری کسی ملک کی مضبوط معاشی اور اقتصادی حالت، اس قدر مضبوط کے وہاں کے حکمران شاندار عمارات تعمیر کرنے کا خرچ برداشت کر سکیں. معاشی حوالے سے ہندوستان بالعموم مسلم ادوار اور بالخصوص مغلیہ دور (اکبر - عالگیر) میں دنیا کے کل GDP میں اوسطاً 25% فیصد حصہ رکھتا تھا. در آمدات انتہائی کم اور برآمدات انتہائی زیادہ تھیں اور آج ماہر معاشیات جانتے ہیں کہ کامیاب ملک وہ ہے جس کی برآمدات زیادہ اور درآمدات کم ہوں. سترویں صدی میں فرانسیسی سیاح فرانکیوس برنئیر ہندوستان آیا اور کہتا ہے کہ ہندوستان کے ہر کونے میں سونے اور چاندی کے ڈھیر ہیں. اسی لئے سلطنت مغلیہ ہند کو سونے کی چڑیا کہتے تھے.
اب تعمیرات والے اعتراض کی طرف آتے ہیں. فن تعمیر کی جو تفصیلات تاج محل، شیش محل، شالامار باغ، مقبرہ ہمایوں، دیوان خاص وغیرہ وغیرہ میں نظر آتی ہے، اس سے لگتا ہے کہ انکے معمار جیومیٹری کے علم کی انتہاؤں کو پہنچے ہوئے تھے. تاج محل کے چاروں مینار صرف آدھا انچ باہر کی جانب جھکائے گئے تاکہ زلزلے کی صورت میں گرے تو گنبد تباہ نہ ہوں. مستری کے اینٹیں لگانے سے یہ سب ممکن نہیں، اس میں حساب کی باریکیاں شامل ہیں. پورا تاج محل 90 فٹ گہری بنیادوں پر کھڑا ہے. اس کے نیچے 30 فٹ ریت ڈالی گئی کہ اگر زلزلہ آئے تو پوری عمارت ریت میں گھوم سی جائے اور محفوظ رہے. لیکن اس سے بھی حیرانی کی بات یہ ہے کہ اتنا بڑا شاہکار دریا کے کنارے تعمیر کیا گیا ہے اور دریا کنارے اتنی بڑی تعمیر اپنے آپ میں ایک چیلنج تھی، جس کے لئے پہلی بار ویل فاونڈیشن (well foundation) متعارف کرائی گئی یعنی دریا سے بھی نیچے بنیادیں کھود کر انکو پتھروں اور مصالحہ سے بھر دیا گیا، اور یہ بنیادیں سینکڑوں کی تعداد میں بنائی گئی گویا تاج محل کے نیچے پتھروں کا پہاڑ اور گہری بنیادوں کا وسیع جال ہے، اسطرح تاج محل کو دریا کے نقصانات سے ہمیشہ کے لئے محفوظ کر دیا گیا. عمارت کے اندر داخل ہوتے ہوئے اسکا نظارہ فریب نظر یعنی (Optical illusion ) سے بھرپور ہے. یہ عمارت بیک وقت اسلامی، فارسی، عثمانی، ترکی اور ہندی فن تعمیر کا نمونہ ہے. یہ فیصلہ کرنے کے لئے حساب اور جیومیٹری کی باریک تفصیل درکار ہے. پروفیسر ایبا کوچ (یونیورسٹی آف وینیا) نے حال میں ہی تاج محل کے اسلامی اعتبار سے روحانی پہلو واضح (decode) کئے ہیں.اور بھی کئی راز مستقبل میں سامنے آ سکتے ہیں. انگریز نے تعمیرات میں (well foundation) کا آغاز انیسویں صدی اور (optical illusions) کا آغاز بیسویں صدی میں کیا. جب کے تاج محل ان طریقہ تعمیر کو استعمال کر کے سترھویں صدی کے وسط میں مکمل ہو گیا تھا. آج تاج محل کو جدید مشین اور جدید سائنس کو استعمال کرتے ہوئے بنایا جائے تو 1000 ملین ڈالر لگنے کے باوجود ویسا بننا تقریباً ناممکن ہے. 'ٹائل موزیک' فن ہے ، جس میں چھوٹی چھوٹی رنگین ٹائلوں سے دیوار پر تصویریں بنائی جاتی اور دیوار کو منقش کیا جاتا ہے. یہ فن لاہور کے شاہی قلعے کی ایک کلومیٹر لمبی منقش دیوار اور مسجد وزیرخان میں نظر آتا ہے. ان میں جو رنگ استعمال ہوئے، انکو بنانے کے لئے آپ کو موجودہ دور میں پڑھائی جانے والی کیمسٹری کا وسیع علم ہونا چاہئیے. یہی حال فریسکو پینٹنگ کا ہے، جن کے رنگ چار سو سال گزرنے کے باوجود آجتک مدہم نہیں ہوئے . تمام مغل ادوار میں تعمیر شدہ عمارتوں میں ٹیرا کوٹا (مٹی کو پکانے کا فن) سے بنے زیر زمین پائپ ملتے ہیں. ان سے سیوریج اور پانی کی ترسیل کا کام لیا جاتا تھا. کئی صدیاں گزرنے کے باوجود یہ اپنی اصل حالت میں موجود ہیں. مسلم فن تعمیر کا مکمل علم حاصل کرنے کی کوشش کی جائے اور موجودہ دور کے سائنسی پیمانوں پر ایک نصاب کی صورت تشکیل دیا جائے تو صرف ایک فن تعمیر کو مکمل طور پر سیکھنے کے لیے پی ایچ ڈی (phd) کی کئی ڈگریاں درکار ہوں گی. کیا یہ سب کچھ اس ہندوستان میں ہو سکتا تھا، جس میں جہالت کا دور دورہ ہو اور جس کے حکمرانوں کو علم سے نفرت ہو؟؟ یہ مسلم نظام تعلیم ہی تھا جو سب کے لئے یکساں تھا، جہاں سے بیک وقت عالم، صوفی، معیشت دان، طبیب، فلسفی، حکمران اور انجینئر نکلتے تھے. شیخ احمد سرہندی رح ہوں یا جھانگیر ہو یا استاد احمد لاہوری ہو، یہ سب مختلف گھرانوں سے تعلق رکھنے کے باوجود ایک ہی تعلیمی نظام میں پروان چڑھے، اسی لئے ان سب کی سوچ انسانی مفاد کی تھی.
مزید بھی میں مغربی مصنفین کی گواہی پیش کروں گا، اسلئے کہ میرے ان "عظیم" صاحبان علم کو کسی مسلمان یا لوکل مصنف کی گواہی سے بھی بو آتی ہے. ول ڈیورانٹ مغربی دنیا کس مشہور ترین مورخ اور فلاسفر ہے. وہ اپنی کتاب story of civilization میں مغل ہندوستان کے بارے میں لکھتا ہے: "ہر گاوں میں ایک سکول ماسٹر ہوتا تھا، جسے حکومت تنخواہ دیتی تھی. انگریزوں کی آمد سے پہلے صرف بنگال میں 80 ہزار سکول تھے. ہر 400 افراد پر ایک سکول ہوتا تھا. ان سکولوں میں 6 مضامین پڑھائے جاتے تھے. گرائمر، آرٹس اینڈ کرافٹس، طب، فلسفہ، منطق اور متعلقہ مذہبی تعلیمات. " اس نے اپنی ایک اور کتاب A Case For India میں لکھا کہ مغلوں کے زمانے میں صرف مدراس کے علاقے میں ایک لاکھ 25 ہزار ایسے ادارے تھے، جہاں طبی علم پڑھایا جاتا اور طبی سہولیات میسر تھیں. میجر ایم ڈی باسو نے برطانوی راج اور اس سے قبل کے ہندوستان پر بہت سی کتب لکھیں. وہ میکس مولر کے حوالے سے لکھتا ہے "بنگال میں انگریزوں کے آنے سے قبل وہاں 80 ہزار مدرسے تھے". اورنگزیب عالمگیر رح کے زمانے میں ایک سیاح ہندوستان آیا' جس کا نام الیگزینڈر ہملٹن تھا، اس نے لکھا کہ صرف ٹھٹھہ شہر میں علوم و فنون سیکھانے کے 400 کالج تھے. میجر باسو نے تو یہاں تک لکھا ہے کہ ہندوستان کے عام آدمی کی تعلیم یعنی فلسفہ، منطق اور سائنس کا علم انگلستان کے رئیسوں حتیٰ کہ بادشاہ اور ملکہ سے بھی زیادہ ہوتا تھا. جیمز گرانٹ کی رپورٹ یاد رکھے جانے کے قابل ہے. اس نے لکھا " تعلیمی اداروں کے نام جائیدادیں وقف کرنے کا رواج دنیا بھر میں سب سے پہلے مسلمانوں نے شروع کیا. 1857ء میں جب انگریز ہندوستان پر مکمل قابض ہوئے تو اس وقت صرف روحیل کھنڈ کے چھوٹے سے ضلع میں، 5000 اساتذہ سرکاری خزانے سے تنخواہیں لیتے تھے." مذکورہ تمام علاقے دہلی یا آگرہ جیسے بڑے شہروں سے دور مضافات میں واقع تھے. انگریز اور ہندو مورخین اس بات پر متفق ہیں کہ تعلیم کا عروج عالمگیر رح کے زمانے میں اپنی انتہا کو پہنچا. عالمگیر رح نے ہی پہلی دفعہ تمام مذاہب کے مقدس مذہبی مقامات کے ساتھ جائیدادیں وقف کیں. سرکار کی جانب سے وہاں کام کرنے والوں کے لئے وظیفے مقرر کئے. اس دور کے 3 ہندو مورخین سجان رائے کھتری، بھیم سین اور ایشور داس بہت معروف ہیں. سجان رائے کھتری نے "خلاصہ التواریخ"، بھیم سین نے "نسخہ دلکشا" اور ایشور داس نے "فتوحات عالمگیری" لکھی. یہ تینوں ہندو مصنفین متفق تھے کہ عالمگیر نے پہلی دفعہ ہندوستان میں طب کی تعلیم پر ایک مکمل نصاب بنوایا اور طب اکبر، مفرح القلوب، تعریف الامراض، مجربات اکبری اور طب نبوی جیسی کتابیں ترتیب دے کر کالجوں میں لگوائیں تاکہ اعلیٰ سطح پر صحت کی تعلیم دی جا سکے. یہ تمام کتب آج کے دور کے MBBS نصاب کے ہم پلہ ہیں. اورنگزیب سے کئی سو سال پہلے فیروز شاہ نے دلی میں ہسپتال قائم کیا، جسے دارالشفاء کہا جاتا تھا. عالمگیر نے ہی کالجوں میں پڑھانے کے لیے نصابی کتب طب فیروزشاہی مرتب کرائی. اس کے دور میں صرف دلی میں سو سے زیادہ ہسپتال تھے.
تاریخ سے ایسی ہزاروں گواہیاں پیش کی جا سکتی ہیں. ہو سکے تو لاہور کے انارکلی مقبرہ میں موجود ہر ضلع کی مردم شماری رپورٹ ملاحظہ فرمالیں. آپکو ہر ضلع میں شرح خواندگی 80% سے زیادہ ملے گی جو اپنے وقت میں بین الاقوامی سطح پر سب سے زیادہ تھی، لیکن انگریز جب یہ ملک چھوڑ کر گیا تو صرف 10% تھی. بنگال 1757ء میں فتح کیا اور اگلے 34 برسوں میں سبھی سکول و کالج کھنڈر بنا دیئے گئے. ایڈمنڈ بروک نے یہ بات واضح کہی تھی کہ ایسٹ انڈیا کمپنی نے مسلسل دولت لوٹی جس وجہ سے ہندوستان بدقسمتی کی گہرائی میں جاگرا. پھر اس ملک کو تباہ کرنے کے لئے لارڈ کارنیوالس نے 1781ء میں پہلا دینی مدرسہ کھولا. اس سے پہلے دینی اور دنیاوی تعلیم کی کوئی تقسیم نہ تھی. ایک ہی مدرسہ میں قرآن بھی پڑھایا جاتا تھا، فلسفہ بھی اور سائنس بھی. یہ تاریخ کی گواہیاں ہیں. لیکن اشتہار و پروگرام بنانے والے جھوٹ کا کاروبار کرنا چاہے تو انہیں یہ باطل اور مرعوب نظام نہیں روکتا.
مجھے دہلی جانے کا اتفاق ہوا ہے اور ان تعمیرات کا مشاہدہ کیا ہے، آپ یقین کیجئیے کہ ان عمارات کے سحر سے نکلنا ایک مشکل کام ہوتا تھا اور فخر اور حیرانی ہوتی تھی کہ ان ادوار میں مشین کا وجود نا ہونے کے باوجود ایسے شاہکار تعمیر کرنا ناممکن لگتا ہے. لاہور میں مغلیہ فن تعمیر پر کبھی نظر دوڑائیے، آپ انجینئرنگ کے کارناموں پر محو حیرت رہے گے کیونکہ جب یورپ یونیورسٹیاں بنا رہا تھا تو یہاں وہ تعلیمات عام ہو چکی تھیں. لیکن یہ موجودہ ظالم نظام جہاں ہمیں اپنی اعانت کے لئے اپنا کلرک بناتا ہے وہاں ہماری عظیم تاریخ کو بھی مبہم بناتا ہے.
تحریر کا اختتام کرنے کے لئے بہت کچھ ہے لیکن ایک سنہری قول سے اختتام کروں گا.
"آج مسلمانوں کی سب سے بڑی کمزوری یہ ہے کہ انہیں ذرائع ابلاغ (Media) کا پروپیگنڈا بہا کے لے گیا.

اساتذہ کرام توجہ فرمائیں

اکثر ہم اساتذہ منفی ہی سوچتے ہیں کل اسکول 84 دن بعد لگے خوب مزے کیے شدید آگ برساتی گرمی میں گھر رہے روزے رکھے ایک سوچ پیدا ہوئی اگر کوئی پرائیویٹ فیکٹری میں کام کر رہا ہو تنخواہ کم ہو ملازم مالک کو بولے کہ تنخواہ بڑھائیں وہ یا تو سرے سے انکار کر دے گا یا بولے گا فیکٹری بند ہے باہر سے پیسے آ لیں مشینیں چل لیں آمدنی ہو تو پھر تنخواہ بڑھائیں گے .
ہم پر کتنا الله کا کرم ہے فیکٹری یعنی اسکول بند تھے مشینیں یعنی کلاس روم بند طلبا گھروں میں تھے گھر چارپائی پر آرام کر رہے تھے اور ہماری تنخواہیں دس فیصد بڑھی ہوئی کرایہ مکان اگرچہ کم ہے لیکن پچاس فیصد بڑھا ہوا مزید سینئر کا ٹیکس بھی ایک ہزار سے چار ہزار کم کٹوتی ہوئی آگئی 
تجربہ ہے جب جب اپنی نوکری کو کوسیں اپنی نوکری کی تکالیف کا ذکر کریں ہم میں کام سے نفرت پیدا ہوتی ہے لیکن جب ایسی سوچیں ہوں تو ہم صحت مند رہتے ہیں خوش رہتے ہیں 
ہم پر عظیم ذمہ داری ہے خدا ہم سب کو قوم کے نونہالوں کو دل و جان سے پڑھانے کی توفیق دے

آداب طریقت

آداب طریقت . . .ہر صاحب نسبت توجہ سے مکمل پڑھے شیئر کرے اور ان آداب پر عمل پیرا ہونے کی کوشش کرے
  ادب اور محبت دونوں لازم و ملزوم ہیں جسقدر دل میں محبت پیدا ہو گی اسی قدر ادب میں اضافہ ہو گا اور جنتا زیادہ ادب اختیار کیا جائے گا محبت میں اضافہ ہو گا محبت ایک ایسا جزبہ ہے جسکا نتیجہ ادب کی صورت میں ظاہر ہوتا ہے. . بقول شاعر محبت سکھاتی ہے جینے کاڈھب. محبت کا پہلا قرینہ ادب 
محبت میں اضافے کے کچھ ایسے زرائع ہیں جو اختیار کیے جائیں تو محبت میں شدت پیدا ہوتی ہے اس میں سب سے اہم زریعہ تصور شیخ ہے جسقدر تصور شیخ میں شدت پیدا ہوتی جائے گی محبت میں بھی اضافہ ہوتا جائے گا اور ذکر الہی اور اذکار بااجازت شیخ میں اضافہ ہوتا جائے گا تصور شیخ میں اسقدر پختگی ہوتی جائے گی. جب ایک سالک پر کیفیات کا نزول ہوتا ہے تو وہ خود کو دریائے محبت میں غوطہ زن پاتا ہے اور اس محبت کا محور ذات مرشد کو سمجھتا ہے لیکن جیسے ہی وہ ان کیفیات سے باہر آتا ہے دنیاوی معاملات اسے گھیرے میں لے لیتے ہیں اور اسکی توجہ کم ہونے لگتی ہے. . کیفیات کا ہر وقت قائم رہنا ممکن نہیں ہوتا اسلیے سالک کو چاہیے کے راہِ طریقت میں کسب کو بھی اختیار کرے 
آداب طریقت و آداب مرشد کسی کتاب میں میں درج الفاظ پر مبنی شرائط پر عمل پیرا ہونے کا نام نہیں بلکہ یہ تو وہ کیفیات باطنی ہیں جو اس راہ پر چلنے والے پر گاہے بگاہے طاری ہوتی رہتی ہیں اور ان لمحات میں جو آداب کی کیفیات پیدا ہوتی ہیں انھی کو حالت ہوش میں اپنے کسب سے جاری رکھنے کا نام ادب ہے. . . صوفیائے کرام نے سالکین کی رہنمائی کیلیے آداب کے سلسلہ میں بہت کچھ تحریر فرمایا ہے مرشدِ کامل مظہر خداوندی ہوتا ہے. تو چاہیے کے ادب بھی ویسے ہی کیا جائے اصل ادب تو یہ ہے کہ طالب اپنے شیخ کے فرمان پر اسکی تعلیمات پر مکمل عمل کرے اور اپنے ظاہر و باطن کو اپنے مرشد کے سراپا میں ڈھالے ا
نکی پسند کو اپنی پسند بنائے اور جن چیزوں کو وہ ناپسند کریں انکو ترک کر دے 
گناہوں کو ترک کر دے اور اعمال صالح اور ذکر خداوندی اختیار کرے 
جب اپنے مرشد کی بارگاہ میں حاضری کا ارادہ ہو تو خوب صاف ستھرا لباس پہنے سر ڈھانپ کر عاجزی اور ادب سے بارگاہ مرشد میں حاضر ہو دروازے پر آہستگی سے دستک دے اور موّدب کھڑا رہے انتظار کرے یہاں تک کے استانہ سے کسی کا جواب موصول ہو. . اس بات کا خیال رکھے کے شیخ سے ملاقات کا وقت ایسا منتخب کرے کے جسمیں انکی مصروفیات میں کوئی خلل واقع نہ ہو اور اگر ہو سکے تو اپنے شیخ کی خدمت میں کوئی نہ کوئی تحفہ حسبِ توفیق ضرور لیکر جائے. ادب سے دست بوسی کرے اور جب تک مرشد اپنی نشست پر تشریف فرما نہ جائیں. ادب سے سر جھکا کر کھڑا رہے پھر شیخ کے حضور دوزانو سرجھکا کر بیٹھے. . اور انکے ارشادات کو کان لگاکر خوب شوق اور توجہ کیساتھ سنے اور اگر کوئی بات کرنا ہو تو نہائت دھیمے اور نرم لہجہ میں کرے. . شیخ کی غیر موجودگی میں انکی نشست پر مت بیٹھے. شیخ سے اونچی جگہ پر مت بیٹھے. جب شیخ کے ساتھ چلے تو ادب سے پیچھے چلے اپنے قدم شیخ کے قدم سے آگے نہ بڑھائے. اپنے مرشد کے سائیہ کا بھی ادب کرے اور اپنے قدم چلتے ہوئے مرشد کے سائیہ پر بھی نہ آنے دے. . اپنے مرشد کی طرف کبھی پیٹھ نہ کرے جب اجازت لیکر جانے لگے تو الٹے قدم واپس ہو.  
اگر مرشد کسی بات پر اظھار ناراضگی فرمائیں تو جن وجوہات کی بناء پر شیخ ناراض یوئے اسکا فوراً تدارک کرے اپنے مرشد کی دائرہ شریعت کے اندر کسی بات پر اعتراض نہ کرے. اور اگر کوئی بات سمجھ نہ آئے تو اسے اپنی کم عقلی جانے.  
جب مرشد کوئی نصیحت فرمائیں تو اسمیں اپنی طرف سے کوئی تاویل نہ کرے من وعن قبول کر لے
کیونکہ مرید کی لغت میں کیوں کب اور کیسے کےالفاظ نہیں ہونے چاہیں.  
اپنے مرشد کے مخالفین سے قطعاً دوستی نہ رکھے.  
جن لوگوں کو شیخ پسند فرماتے ہیں ان لوگوں کا بھی ادب کرے اپنے مرشد کے زیر استعمال اشیاء کا بھی ادب کرے. اپنے جان و مال کو اپنے مرشد کی ملکیت جانے اور انکے حکم کی تعمیل کو اولین ترجیع دے
اگرچہ مرید نے سالہا سال اپنے مرشد کی خدمت گزاری کی ہو مگر دل میں کبھی خیال نہ لائے کہ میں اپنے مرشد کی خدمت کا حق ادا کر چکا ہوں
اپنے مرشد کے حضور دنیاوی معاملات پیش نہ کرے. اور روحانی معاملات کو بھی احسن طریقہ سے بیان کرے. اپنے کسی پیر بھائی سے حسد نہ کرے. اور اسکی روحانی ترقی پہ خوشی کا اظھار کرے. اپنے پیر بھائیوں کا بھی اپنے مرشد جیسا ہی احترام کرے خصوصاً خلفاء کا بہت زیادہ احترام کرے.  
اپنے مرشد سے صرف انکی محبت کی خواہش رکھے 
مراتب کے حصول کی خواہش کو دل میں جگہ نہ دے اور جب کبھی مرشد خوش ہو کر اپنی رضا و خوشی سے. اجازت و خلافت عطا فرما دیں تو اسے دل و جان سے قبول کرے اور اجازت و خلافت کو خدمت خلق سمجھے اور ہمیشہ خادم بنکر رہے کبھی کرامت طلب نہ کرے
محبت مرشد میں خود کو فناء کر دے اپنی صفات کو شیخ کی صفات سے بدل ڈالے اپنی ہر رضا کو رضائے مرشد میں گم کر دے ظاہری و باطنی طور پر اپنے مرشد کی مکمل صورت بن جائے. . اور اس شعر کا مصداق بن جائے 
من تو شدم تو من شدی من تن شدم تو جاں شدی 
تاکس نہ گویدبعد ازیں من دیگرم تو دیگری
اللہ کریم سے دعا ہے کہ صدقہ نبی اکرمؑ کا ہمسبکو اپنے مرشد کامل کی مکمل اتباع اور ادب و احترام اور سچی محبت نصیب فرمائے آمین ثم آمین. کیونکہ نگاہِ مرشد کامل سے عشقِ مصطفیؑ حاصل
خدا کا قُرب دیتی ہے محبت پیر خانے کی.

تلاوت قرآن پاک سے تزکیہ کیسے ہوتا ہے

ایک بزرگ دریا کے کنارے دنیا سے قدرے ہٹ کر کٹیا میں رہتے تھے، ان کے پاس ایک نوجوان گیاجو حق کا متلاشی تھا.
اس نے سوال کیا کہ:
بابا جی بتائیے بھلا قرآن پاک پڑھنے سے دل کا زنگ کیسے اترتا ہے جبکہ ہمیں سمجھ بھی نہیں آتی؟
بابا جی گہرے استغراق میں گم تھے سنی ان سنی کردی.
نوجوان نے پھر سوال کیا جب تیسری مرتبہ اس نے یہی سوال کیا تو بابا جی نے بیزارگی سے اسے جواب دیتے ہوئے کہا:
جا وہاں کونے میں بالٹی پڑی ہے اس میں سے کوئلے نکال کر رکھ دے اور قریب ہی دریا سے پانی بھر کر لا.
نوجوان حد ادب کی وجہ سے اپنے سوال کے اس عجیب جواب پر جزبز ہوا مگر احترام حائل تھا لہٍذا خاموشی سے اٹھا اور بالٹی لے کر باہر دریا کی جانب روانہ ہوگیا. کوئلوں کی وجہ سے بالٹی باہر سے چمکدار اور اندر سے سیاہ تھی.
جیسے ہی نوجوان نے دریا سے پانی لیا اور بالٹی اٹھا کر چلا تو یکایک اسے معلوم ہواکہ بالٹی میں سوراخ ہیں جن سے پانی کٹیا تک پہنچتے پہنچتے سارا بہہ گیا. وہ اندر داخل ہوا بابا جی نے سارا ماجرہ سنا اور کہا دوبارہ جا.
نوجوان سمجھ گیا کہ بابا جی کی بات میں ضرور کوئی حکمت ہے لہذا بالٹی اٹھائی اور پھر چل پڑا.
دوبارہ پانی بھرا مگر پھر وہی ہوا کہ سارا پانی پہنچنے سے پہلے بہہ گیا.
بابا جی نے سنا لیکن پھر کمال لاپرواہی سے کہا کہ:
جا پھر لا.
نوجوان نے اس طرح کئی چکر کاٹے جب تھک گیا تو بابا جی کو کہنے لگا:
آپ نجانے کیوں میرے ساتھ یہ سلوک کرر ہے ہیں جبکہ آپ دیکھ رہے ہیں کہ بالٹی میں کسی طرح سے پانی نہیں آ سکتا.
اب بابا جی مسکرائے اور کہا:
ذرا دیکھ بالٹی کو اندر سے کیا یہ ویسے ہی سیاہ ہے جیسے پہلے چکر میں تو نے اسے دیکھا تھا؟
نوجوان نے بالٹی کو دیکھا اور کہا:
نہیں اب تو یہ صاف ہو گئی، اتنی بار پانی جو بھرا ہے اس میں.
بابا جی نے شفقت سے مسکراتے ہوئے کہا:
پانی نہیں پہنچا لیکن اسکی صفت نے بالٹی کو سیاہ سے سفید کردیا ہے، یہی قرآن پاک کی صفت ہے. پڑھتا جا، پڑھتا جا، پڑھتا جا اسکی صفات تیرے دل کو یونہی زنگ سے صاف کر کے اس دل میں موجود دنیا داری کے سوراخوں سے سارا زنگ بہا لے جائے گی آخر میں دل صاف ستھرا دنیا کی آلائش سے پاک ہوکر تجھے الله سے ہمیشہ ہمیشہ کیلئے جوڑدے گا. بس یہی تھا تیرے سوال کا جواب